ភ្នំពេញ៖ ប្រធានសហភាពសហព័ន្ធយុវជនកម្ពុជាលោក ហ៊ុន ម៉ានី លើកឡើងថា ស្មារតីនៃភាពជាម្ចាស់ផ្ទះប្រកបដ៏ស្ញប់ស្ញែងទាំងអស់នេះបង្កើតបានជាប្រវត្តិសាស្ត្រថ្មីនៃសម័យកាលដ៏រុងរឿងមួយ ជាមួយការបង្ហាញនូវសក្តានុពល និងថាមពលដ៌អង់អាចរបស់ប្រជាជាតិកម្ពុជា។

លោក ហ៊ុន ម៉ានី លើកឡើងដូចនេះលើបណ្តាញសង្គមលោកផ្ទាល់នៅថ្ងៃទី១៨ ខែឧសភា ឆ្នាំ២០២៣ ក្រោយពិធីបើក និងបិទព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ និងបញ្ជាក់ថាកម្ពុជាជាម្ចាស់ផ្ទះប្រកបដោយភាពជោគជ័យ និងភាពល្បីល្បាញឮសាយខ្ទរខ្ទារពេញពិភពលោក នៃព្រឹត្តិការណ៍កីឡាអាស៊ីអាគ្នេយ៍លើកទី៣២ គឺមិនអាចកាត់ផ្តាច់បាននូវការចូលរួមបង្ហាញផ្ទាំងទស្សនីយភាពនៃពិធីបើក និងពិធីបិទ។

លោកបានឱ្យដឹងទៀតថា កម្ពុជាពិតជាមានមោទកភាពចំពោះការបង្ហាញទស្សនីយភាពដ៏ស្រស់បំព្រងអស្ចារ្យ និងរស់រវើកប្រកបដោយអត្ថន័យដ៏ជ្រាលជ្រៅ ហើយប្រជាជនកម្ពុជា និងទូទាំងពិភពលោក បានទទួលស្គាល់ថា ក្រុមសិល្បៈ និងទស្សនីយភាពនៃព្រឹត្តិការណ៍កីឡាអាស៊ីអាគ្នេយ៍ ទាំងពិធីបើក និងទាំងពិធីបិទបានធ្វើឲ្យបេះដូងរបស់ប្រជាជនកម្ពុជាលោតក្នុងចង្វាក់តែមួយ ពោរពេញទៅដោយក្តីស្រឡាញ់ ក្តីរំភើប ស្នាមញញឹម ជាមួយមោទនភាពស្របពេលជាមួយគ្នា។

ជាមួយគ្នានេះដែរ លោកសូមកោតសរសើរក្រុមការងារ លោកគ្រូ អ្នកគ្រូ ក្រុមសម្តែង សិល្បករ សិល្បការិនី អត្តពលិក កងកម្លាំង សិស្ស និស្សិត យុវជន យុវនារី កុមារា កុមារី ក្រុមការងារបច្ចេកទេស និងអ្នកដែលបានចូលរួមប្រឹងប្រែងទាំងអស់គ្នាអស់ពីកម្លាំងកាយចិត្ត ហើយបានប្រគល់ថាមពលគ្រប់យ៉ាងជូនដល់ជាតិ មាតុភូមិទាំងក្នុងពិធីបើក ទាំងក្នុងពិធីបិទ រួមជាមួយព្រឹត្តិការណ៍អមនានា នៃព្រឹត្តិការណ៍កីឡាអាស៊ីអាគ្នេយ៍លើកទី៣២នេះ។

លោក ហ៊ុន ម៉ានី គូសបញ្ចាក់ថា៖ «ទិដ្ឋភាពទាំងអស់នេះ ជាកត្តាលិករដ៏សំខាន់ដែលមិនអាចកាត់ផ្តាច់បាន ក៏ដូចជាជាកត្តាចម្បងមួយដែលនាំឲ្យព្រឹត្តិការណ៍កីឡាកម្រិតអន្តរជាតិនេះទទួលបានជោគជ័យយ៉ាងគាប់ប្រសើរក្រៃលែង»៕